Opent brev om etablering av brakkeriggar i Dragsund
Opent brev til Utval for samfunnsutvikling i Herøy kommune
Bakgrunn
Vi skriv dette brevet som uroa innbyggjarar i Herøy kommune. Vi reagerer på vedtaket om å gi Langset Solutions og Bauta Group høve til å søkje dispensasjon for å setje opp bustadriggar i Dragsund næringspark. Planlagt plassering ligg tett opp mot Møre Barne- og ungdomsskule, som er nærskulen til mange born i Indre Herøy, og i nærområdet til bustadfelta i Myrvåg – eit område i sterk vekst og attraktivt for familiar.
Hovudargument
Tryggleik og trivsel for barn og unge
I referat frå Formannskapsmøtet 17.09.25 står det: «Konsekvensar for barn og unge: Usikkert. Kommunedirektøren er usikker på om etablering av bustadrigg nært eit skuleområde kan ha negative konsekvensar.» Vi meiner det er uakseptabelt å gå vidare utan grundig konsekvensutgreiing.
Manglande konsekvensanalyse og hastverk
Saka er handsama raskt utan at konsekvensutgreiing føreligg. Kvifor denne hastverksprosessen i ei sak som påverkar lokalsamfunnet så sterkt?
Nærleik til bustadområde
I brev frå Bauta Bygg AS (19.11.25) står det: «Dette kan potensielt være uheldig dersom boligriggen legges i område regulert til boliger, hvor folk bor permanent.» Vi spør: Kva definerer kommunen som «nærleik til bustadområde»? Dragsund næringspark ligg midt i eit område med bustader, barnehage og skule.
Uavklara tidsplan og behov
Det er uklart kor lenge riggane skal stå og kva behov dei skal dekke. Skal mellombels bustad bli ein langvarig realitet?
Framtidig utvikling og arealbruk
Korleis påverkar dette planane for næringsutvikling og bustadbygging i området? Er kortsiktig gevinst viktigare enn langsiktig samfunnsutvikling?
Demokratisk prosess
Herøy kommune sine vedtekter krev at innkalling og saksliste, som hovudregel skal vere tilgjengeleg minst 7 dagar før møtet. Saklista er signert 21.11.25, medan møtet er 26.11.25.
Kritiske spørsmål til utvalet
1. Kvifor blir dispensasjonssøknaden fremja utan konsekvensutgreiing for barn, unge og lokalsamfunn?
2. Korleis vurderer kommunen tryggleik og trivsel for born i nærområdet?
3. Kva er definisjonen av «nærleik til bustadområde» i denne saka?
4. Korleis sikrar kommunen langsiktig planlegging og arealbruk?
5. Er dei økonomiske inntektene større enn dei sosiale konsekvensane?
6. Kvifor blir vedtektene om sakshandsamingstid ikkje følgde?
Oppsummering
Vi er ikkje imot arbeidsinnvandring eller næringsutvikling – tvert imot. Men bustadriggar høyrer heime i område tilrettelagt for mellombels bustad, ikkje i hjartet av eit levande lokalsamfunn. Kommunen har ansvar for tryggleik, trivsel og langsiktig utvikling.
Vi meiner at saka krev meir tid til grundig konsekvensutgreiing før det blir fatta vedtak. Utvalet bør òg revurdere si innstilling om å gi dispensasjon og sikre at alle relevante omsyn – særleg tryggleik for barn og unge, arealbruk og framtidig utvikling – blir vurderte på ein open og forsvarleg måte. Vi oppmodar Utval for samfunnsutvikling til å utsette avgjerda, gjennomføre nødvendige analysar og finne alternative løysingar som både ivaretek behovet for arbeidskraft og lokalsamfunnet sitt behov for tryggleik og ro.
Med håp om ei ansvarleg og framtidsretta vurdering.
Ønsker du å lese i saksdokument sjå her;
https://www.vestlandsnytt.no/nyhende/n/alrloa/saa-mange-skal-innlosjerast-i-dragsund
https://www.vestlandsnytt.no/nyhende/n/bmRM7d/bustadriggar-skapte-debatt
Yvonne S. Beitveit, Rebekka Sætre, Henriette S. Belden Kontakt personen bak underskriftskampanjen