Stopp hotellplanane i Bryggjeparken i Fyresdal
I kommunestyremøtet 19.03 blei omdisponering av eit areal i Bryggjeparken lagt fram til handsaming, utan høyring. Eit statleg sikra friluftsområde – eit område som kommunen sjølv bad staten om å sikre, nettopp for å halde det ope, tilgjengeleg for framtida. Kommunen tok på seg eit ansvar: å forvalte området til beste for allmenta, ikkje til særinteresser som t.d. hotell.
Bryggjeparken er ein av dei mest brukte møteplassane i bygda. Her møtest ungar, familiar, eldre, turgåarar, badegjester og tilreisande. Kyrkja og gravplassen ligg tett på det aktuelle området, og er i dag ein plass for ettertanke og ro. Hotell i dette området vil endre heile opplevinga av friluftsområdet, og kulturmiljøet i tilknytting til kyrkja.
På under tre dagar har over 150 fastbuande allereie signert mot omdisponeringa på minsak.no. Det viser eit sterkt lokalt engasjement. Med dette oppropet opnar vi for at også andre som brukar og verdset området får høve til å seie ifrå: hytteeigarar, utflytta fyresdølar, feriegjester og naturinteresserte.
Når kommunen vel å gå vidare utan høyring, går dei mot god forvaltningsskikk. Regjeringa har dei siste åra styrkt satsinga på kunnskapsbasert og berekraftig arealforvaltning, mellom anna gjennom etableringa av det nye Nasjonale senteret for berekraftig areal- og naturbruk. Avgjerder der natur, strandsoner og felles friluftsområder skal bygge på «langsiktige, berekraftige og rettferdige arealval».
Vi meiner at Bryggjeparken skal:
- forbli open og tilgjengeleg
- forvaltast langsiktig
Difor ber vi om at kommunen trekkjer søknaden til Miljødirektoratet. Vi krev at området Bryggjeparken held fram som ope, grønt og tilgjengeleg for alle.
Signer oppropet – for opne og tilgjengelege friluftsareal, for medverknad og langsiktig forvaltning.
____________________________________
Les meir om området rundt Bryggjeparken, om du er interessert:
